Thanks Giving

Report on Upa Nengkhenthang in Pasian gamna kum 25 tan a sepna tung a Pasian kung a NUOMTHU GENNA vaiguon

Awlha ni kuoni, kum tulni leh sagi ahi.Tai khuo hing vah inPasian hoinate a thatha in kilang kia sawnsawn hi. Asiamsa Zu-leh- va leh sing -leh -suongte injong Pasian phat a A khutsuo ten a hoina sulang in Kipahhuai chilou ngal geen ding umlou hi. Tamni pen nidang teng sang in hoidiah hileh akilawm a,akipahhuai diah khawl hi.

A 45 veina Singngat District PaPawl Kumkai Khawmpi leh a 43 veina Singngat Dist.Nupawl/ELWA Kumkai Khawmpi kigawm Zabellei khuo ah Hattuom misiangthou ten jang/mang uhi. Zabellei khuo ahileh Singngat apat mal lam tai 3 vel(5 Km Approx.) a nai ahi. Tam khawmpi kigawm te pang bel inSingngat District sung a um hattuom misiangthou ten a seppi uh Upa Nengkhenthang Samte,Chief of Zabellei,in Singngat District MELC tungtawn a Pasian Mangam na a sepna kum25 a chinna tung ah (Lai att /Secretary pan mun ah) Pasian kung a nuamthu genna vaiguon jong a um hi. Tam vaiguon ahileh mi khenkhat ten theikhial in Secretary Silver Jubillee LAWM sa kha uhi. Tam ahileh a lawm hilou in chinglou leh hatlou tasam hinanleijong tuote hing etsah lou a kum 25 Laiatt a ahing pangsah jiah a NUOMTHU GENNA ahi jo hi. Pasian in thupi na teng teng tang ta hen. Tam vaiguon ah ahing piahsa leh Aneisa ,A gualjawlna toh nuam seng in Annjaluina jong um hi. District in Vohtal tuh Sagi ding vel khat a pang a ,Upa Nengkhenthang leh a innkuonpi ten bawngtal kang lianmama khat in pang uhi. Tam vaiguon ah Upa Nengkhenthang in a gel “Ka Hinkhuo” kichi laibuta khat jong honna um a ,tuobanah Uap pa’n a seppi District sung a upa tengteng kung ah Badge(name plate) a min chiat uh ki gial piah na jong nei hi. Tam vaiguon ah Pasian hoina te ki phawl khe thatha in Thupi na kipia hi.

Vaiguon ahileh Zinglam nai 10:30 chet in ki pan a, Vice Chairman Singngat District MELC in puitu hina laa hi. I Sam.18:18 na sim in Pa Haukhanlal Chairman SD/LYF in hunpatna nei hi. Missionary tawikhawm lah na um a ,Upa Zamsing Muallum in Pasian kung ah latna /appkhiatna nei hi. Tawikhawmte latna nei ahi jou in District Superintendent Rev.M Nengkhanlal M.Th in Upa Nengkhenthang Secretary SD/MELC kum 25 tan puipa kung ah Nuomthu tutna leh Thuumsahna nei hi. Tuojou in Innsung mite-Tate, Naute Mouteleh adang dang a pat pahpiahna um a abanban in silpiah piahna in jom tou detdet hi. Tuojou in Pu T Hangkhanpao MLA Singngat in Upa Nengkhenthang in a bawl/gel “KA HINKHUO” chi laibuta honna Nu Mandeiching khut a pat sang in nei hi. Laibuta hon ahijou in mipi te lah a hawmjah in um pai hi. Tuo jou in Upa Nengkhenthang a pat thu gena in ajom tou ngal hi.

Aman a genna ah “Pasian naa kum 25 sem kahi ki chi nanleng jong Pasian Lungdamna ding ,Ama maipha ka sui thei na ding in Tami bawl ing ,tam semkhia ing chi ding bang ma kanei sia, ka chitlou na leh ka hatlou na mai maisuon dingkanei giap hi” a chi hi. Tuoban ah tam vaiguon pichin thei na ding a pang teng teng –sum leh pai,tha leh jung leh Thuumna leh adg. teng kung ah akipah thugen a, a diahdiah in Leivui lah a pat a kai tou a tamtan tun pa I biah Pasiang kung ah Nuomthu tutna leh thupi na teng teng pia hi. Upa Nengkhenthang in a thugen a jawjaw in Zabellei LYF tea pat in Rev.SK Manlun laa phuoh “Mangpa kei koi ka talawm ei?Ka Innsung mite koi atai? Hing suikhiat sah in...” chi laa siamtah a asah uh ngaikhiatna um a koimapou ki tai chiat hi.

Tuochin Rev Dr Ginkhanmung Elect Bishop-Executive Secretary MELC Hqtrs a pat in thu gena ngai khiatna ahia, agenna ah, Tam bang sil/hun pen a vaang mama sil ahia Kipah huai ahi chi a geen ban ah maban a hat josem a sem tou jel ding in hanthawn na jong nei hi. Tuoleh The Women Behind chi jong genkhiatna nei a ,tuonah Upa Nengkhenthang pianna Anu ,Pi Ngaizachiin leh a lawinu Upanu Goikhanman te pulahna nei hi. Executive pu ahileh a Lawinu Pastorpi Mawiniang ban ah ELWA Hqtrs lam a pat Women Promoter Nu Nianhneiching leh Talent Secretary nut oh tam khawmpi siim ding mawngmawng a hing kuon ahi uhi.Tuojou in Pu Liansuonkap General Secretary UZO Gen Hqtrs India cum Secretary Zomi council a pat in thugenna um hi.

UZO Hqtrs. lam a pat a thugenna ngaikhiat ahi jou in Pu T Hangkhanpao MLA Sgt AC a pat thu gena in jomtou pai hi. MLA pun a thu genna ah Politician te leh Hattuom lamkai ten Pasian khawmpi te kum tampi I man khawm thei lou uh a daahuai dan te geen a tu a tam bang a khawmpi a I ki suhtou thei uh kipahhuai a sah dan gen hi. Tuoban ah maban a pan lah ding dan tuomtuom te genna jong nei hi. Tuoban ah Singngat District MELC huongsung a um Hattuom tengteng kung a Solar Lamp Set khat chiat piah ding a chiam ban ah Hattuom Upate tengteng Puonsan silsah na jong nei hi. Tam teng ban ah Zabellei khokiim khopam a um khuo dang Youth Club teng teng kung ah jong Football khat chiat leh Volley ball set khat chiat pia hi.

District Superintendent, MELC Singngat District Rev. M Nengkhanlal in nuomthu genna(vote of thanks) genna a neijou in ‘Mangpa loupi pen ,Kahing pahtawi uhi” chi laa mipi ding in kisa a Vaiguon khahna ,Guolzawlna Thuumna leh Annkuong Thuumna Upa Khamkhansuon Allusingtam in nei a vaiguon khat vei jaw ahi phot ta hi.

Tuojouin Pasian guoljawlna tang in Nitahlam nai 3:00 in mipi’n ann kuong immna ki nei a niang leh tai tah in kine hi. Amin loupi I phat hi.

Mangpan thupina tangta hen.!!!!!!!!!