ZABELLEI SAMTE

PEACE
(Lemna leh Muanna)

# Peace comes from within, don’t seek it without. – Gautama Siddhartha (Founder of Buddhism)
# If you want make Peace. You don’t talk to your friend, You talk to your Enemies. –Moshe Dayan (Israeli Military Leader and Politician)
# Non Violence is only for the Braves –Mahatma Gandhi.

_______________________________________________________________

Khovel in Lemna leh muanna asui lai in, Leitung pumpi a Gam leh nam lamkai kichi ten lemna leh muanna thu a gen lai un a innmun a lougam te uah Zauna, Kitha- kimatna, Hiamngamna, Shina, Gitlouna leh Sualna bukim ten thunei khum in a haasuo ngai vawt sih uhi. Lemna ,Muanna chi a a geen geen lai un, Muanna sui a atai lai un, Leitung pumpi kituah na ding thu gen na in tha leh lungsim tampi seng in kilutuo jen in a geen ua hinanleh a gam alei ua akile kia chiang un galvan chi tuamtuam , thauvui thautang leh a dangdang MIHING tha na ding, matna ding a chijathuai pipi a bawl ua , ahoi josem bawl ding dan angaituo ua atam thei bang abawl veve uhi.

Ei gingtu kichi Tapidawte a ding in I hundampa Mangpa Jesu Khris hing pianni champha I lawp na ding uh hun ahing nai heaiheai ta a, lung leen bang ahuai ngap mama hi. Ahing tungpai ding Khrismass leh Kumtha toh jong ki jawitawn jong hi sim veve in thu tamlou lungsim a umte sung jual lei I chi man ahi. Tam Mass pen eite a ding in tahsa leh hagau a I ki suhhalna leh I ngahlaa pen uleh a thupipen hunkhat ahi hi. Ajiah pen khenkhat a ding in Sa neh na ding ahing hi ding a, khenkhat a ding in nihteen puansil tha neini ahing hi ding hi. Tuachi ma bang in khenkhat a ding in I hundampa I Mangpa Jesu tam leitung a nang leh kei mikhial te tan ding a sa leh sisan a leitung a ahing kumsuh hun chiemtena champha ahi hi. Vantual nuosie a a Itt mama amite hundam ding a Bethlehem a Bawng Inn sung a hing pianni ahi man in. I Mangpa , Lemna Leeng pa ahing pian nin Van a Angel ten ‘Leitung ah Lemna leng hen’ chiin zaila a sa uhi. Tuni a I gen ut pentah ahileh Lemna chi ahi hi.

Tunai leh tumasang a I gam a sil tung te nuo et kia talei, 26/11 (Mumbai Terror Attack) bang, ahisih leh Khrismass kuonkuon a Innlam Gari bandh neunou te bang (Nagaland apat…..) te bang. Lemna kipumkhatna, Ittna ahisihleh Muonnna jieh ahina diei?? Hilaijang lou eee… Lemna leh Muanna a ding a amelma lianpen sulnuo ahi bou hi.

Gingtu, Pasian hattungnung misiangthoute ihi na uah eiten I maban uah sep ding leh bawl ding poimaw mama tamtah in ahing ngah hi. I Laisiangthou in ahing hil ma bang in Ki Ittna khu michin a ding a I leiba uh ahi a, Lemna leh muanna , bitna chite pen I sui ding mai hilou a adel a I del thaw ding uh thupiah ahihi.

Lemna I chipen a man bei ahi laijang sih a, mantam tah ahi hi. A mantam ahiman in a man I pieh uh a kul leh poimaw ahi. Lemna pen a mu/nga a haa a , akep jong a haa a a etkol jong a haa hi. Hinanleh a mansuo / haasuo ding a bailam mama kia hi Ahi tah leh Lemna I chichi uh pen bang ahi talawm a?? Hei a hing kipan a bang chi kep a bang chi et kawl ding a tai chi bang dohna thupi tah a um hi. Bang in Lemna a paallut a dal a diei chi bang jong dohna poimaw tah ahi.

Lemna pen mual leh taangte, Nei leh Lam , Sum leh Pai te , Mipil misiamte ahi- sih leh Khovel/Leitung lamkai te a pat a hing ki pan ding ahi laijang sih a nangma a hing kuon a a nangma ahing kipan ding ahi bou hi. Nangma, Nang apata hing kipan khia a nanga bei mai lou a, nang a kipat a jam khia a pah leh gaa suong a jam koi ding ahi bou hi. A patna, a khatna nang nahi hi. Lemna leh muanna ,bitna ding a kalbi masa pen nangma nahi. A khatna nahi ding ahi a nahi hi. Sap ten ‘One is the mother of Millions’ a chi bang ua nang a khatna pen a bul nahi hi.Tambang ma khat A thousand miles journey begins with a single step jong aki chi hi.

Ahi. Tam leitung ah Lemna Thuhun thupi tahtah ki siam in hiamngam theina khut jah thauvui thautang leh a dangdang te bawl sut jop lou a tuote a suhsiat a ahoi thei lam bang ding a bawl leh siamleh jah pen poimaw tawh nanleh apoimaw penpen lemna galpa- Hiamngamna pen mihing lunggel a pat a hing kipan ahi chi I thei siam mama masah uh a ngai a, a poimaw pen ahi. Tambang lungsim tawng a gitlouna pen Buddhist sakhuo ham in “ Gamsa hina” (animality) a kichi hi. Tam gamsa hina ah mihing a ding in hoina, phatna leh khantouna , ki ittna leh I mihinpi te ittna chite a ding in mun a nei sih hi. Leitung a hiamngatheina khutjah tengteng thauvui thautang te subei in phiatmang nanlei tam I lungtang tawng a I gamsa hina I pai khiat siang kilkel lou a ahi leh bangma a phattuomna a um sih ding hi. I lungsim , I lungtang tawng a pat a ki siamthana a um lou a hi leh a panna bei leh bangma lou ahi giap ding hi.

Hiamngamna pen bang chi tuh in gapha in phungching tawh nanleh a hoina, akilawmna leh a dihna malmal a umsih hi. Silkhat poupou ah hiamngamna in guoljou lawching in tung ta nanleh a tawpna pen nikhat ni chiang in lawsapna, manthaina ahi veve hi. Hiamngamna pen mi meipuo te ki butna ahibou hi. Pu Mahatma Gandhi in siamtah in “ Nonviolence is not a cover for cowardice, but is the supreme virtue of the brave… Cowardice is wholly inconsistent with nonviolence….. Nonviolence presuppose the ability to strike ……. Truth ang nonviolence is only for the braves” achi hi. Greek te thupil khat in “ Fortune favours only the braves” a chi hi. Unaupa David Vumlallian Zou. Dr in a lai gelna ‘Lungsim leh nehsuina jalenna gam ah(???)’ chi ZSP Shillong Silver Jubille magazine ah “……… khantouna I chi chi jong muanna leh bitna minkhem (alias) maimai ahi”ana chi hi.

Ei Khristian te sakhuo mai hilou in leitung a sakhuo um teng teng in ‘ thuojaw na,jaidamna,ki ittna chite a thuhun te ua thupi pen leh ki hilna lianpen in a nei chiat uhi. Tuochiin “Mihinghina kitaitena” (Humanitarian Competition) aki pi bawl chiat hi. Tam ki taiteh na ah chitahna leh tahpanna chite lamsang a ki thuhilna pen gualjawna ding a lampi um sunsun ahi.

Khovel pumpi, I gamsung, namsung, innsung, khosung, vengsung leh mimal chiet a lemna leh muonna ahing um thei na ding pen koima a hing kipan ding ahi lai jang sih a , tuoleh gamlaa tah a vasui koi ding jong ahi tuon samsih hi. Tam lemna pen nang ma a um khinkhian ahi bou hi Nang a hing kipan ding ahi . Eima chiet a pat a hing kuon ding ahi jo bou hi.

Ahing tunng pai tading I hundampa, I tanpa I Mangpa Jesu Khris hing pian hun I lawp na uh Lungdam Pawi leh hun hing paijel in ahing puoh ding Kumtha in I lah uah lemna leh muuonna bitna te hing puoh ta hen.

Van neiy nuom un,Tanpa hing pei……… David tapa, Kumtawn a pa, LEMNA LENGPA ahi..



© Copy Right ShangSamte
www.zabelleivangkhua.blogspot.com