mthers zopna

A CHILDHOOD MEMOIR

By Shang Samte

(Based on a real life incident and with apology and good faith, not to make someone uncomfortable or embarrassed and not on any means of personal.)

Tuuh tui kiat lai tah hiin ka thei. Loulampi teng a guatui te leh daitui ki gawm ten a nal sah mama a, pilvangtah a pai lou te a ding in kheng gu taa keh thei na vai ahi.

“ I......eahhhh!!! Ka jau Nu Nu ei jau sam ing ei eeeee.....” chia ki kou aw ging khat ka jaa a, bang khat hi ding ahiei chiin kei jong kin tah in ka va nai phei a ka et leh ... Vawt kaunei jau a kikou ana hi giap hi. Ahi. A jaulou te a ding in vaang bang jong ahi sihma a a jau ngalter a ding in ahileh mawh konn thei na ahi. Nuisat in tuo Vawt ka va lah khiat sah hi. Tuo hunlai tah in kalungsim ah ka neulai ua ka tuah khah sil khat ka manghil theilou ahing kilang hi.

Paa pou hunlai khat ahi. Ka naupang mama nalai ua, nikhat ka lawite toh suinlai in chiim ki sa seng in paa sui ding thu kang geen khe kha ua paa sui ding in bawm khat chiat ki puoh in ka kuon nainai ua,lampi ah ka houlim suh ua ka ul mama mai uhi. Maujau lam ka chi uh ,ka kho hang lam ua kuon kahi uhi. Bilbawh ka tun un paasui ding in gamlah ah ka lut chiat ua paasui kawm in ka ki hou limlim ua ka gintatt sang un paa a tam maa ma mai hi.Papaah,Paatung chite pou hun nailou khat a diei ka thei vateh sih hi.Paanai sante, Paakep,Paasuonglum,Paa ahtui chite leh a dang tampi ka mu ua hinanleh ka gintaat sang ua tam jaw ahi man in Panaai Sante maimai ka laa uhi. Ka Paakep te uh ,ka Paa Ahtuite uh ka mawh pai mai ding uh paammai ka sa ua hon ni inka ki khen ua ka ki dou/sep tuo uhi.

Tomlou kal in ka galvante uh hing bei ta ahi man in kaki khawmkhawm kia ua innlam jawt di daan ka hing ngaituo ta uhi. Vaan a niim sim a guo ju ding a bang hi. Chiang kawt khat ka hing tun un a daam mama mai a ,a dap jou kei hi in ka thei hi. Awlawl in ka vah lele ua lamkiim lampam ka daah kiukiau nalai uhi. Paa Naisante aki mu be kha ei, ahisih leh Paa Suonglum, inn tung chiang a em ding ahilouleh bu tung a up ding chiin. Thakhat in a nukhia lam a pai ka lawite uh khat ang peng ta vevo hi. Bang thu a tai chia ka va nai bawl chiat ata uleh ka lawipa uh Vawt jau ana hi dan ahi. Jau tham jong a ching ma hi. Naate lianpi khat ah Vawt kaunei ka chu uh a dim tah in ana um a tuo tengteng pin ka lawipa uh tawp sawm a ana liah sawm uh ahi tazang hi. A tam mama a sawmlii sawm nga beh pha va ka chi hi.A neu jaw tuom chi ding jong a um tuom sih a hoi tah a aki saan chiang ngel uh khap tantan bang a ki jaan jou va duai uhi. Bang lawtheilou chiin ka bawn un ka mawh et thaw ua, bawl ding pen thei lou in kou ma leh kouma ka ki et thaw mai uhi. Ama pa lah … zau ta seng in bawng nou ki diang a bang tazang hi. Ka nua ngaituo a tuoni khu ka mit haa in a mu nalai hi. A bawm a a paa puah te nasan atheipha non sia a ki diang in a ki dian thaw a a peng jah mai hi.

Nitah in Inn a tuo sunlai a ka sil tuah uh ka ngaituo a ka mit ha a aki luai den a ka ngaituo kha kha a ka mit haa in ka tha mu kiakia hi. Ka um daan a ngim thei sih a uinou veisan khum a chi te uh bang hi ding dan kahi.(bang chi na tah a diei vang tutan in thei chiang tahtah nai sing). I mu thei lou in ka ki piapia a ka nu jong lung dawng in bang ahiei khat a dihlou um hiding a giing taa hi ding hi ven awl nou tah in ahing kaina a, “ bawi, a bang chi na hiei???... bang dia I m thewilou a ki piapia na hiei???” chi in mei ahing heh sang a “awleh uilii khat hou um amah leh” chiin ahing vel a , ka maisuo a mu in a lun hi maw a, ‘bang chi na hiei, a jauna mah?? Bang ahiei geen in” chiinahing koi a, tuo chiin ka lung ahing muangdeu hi. Dam tah a ahing houpi na ‘aw’ te tuni tan in ka jaa thei nalai hi. Tuochiin suun lai a ka sil tuoh uh, ka jau dan te , leh ka mit haa a aki luai den a manghil joh theilou kahi dante ka geen a, ka mit ka siin chiang a mu paipai kahi daan te ka geen a tuochiin aka nu’n aw dam tah in ahing heem a ahing haa muan hi.

Tuo jaan a ka Nu’n ahing he neem dante a thuteng tengteng thei non sih nanleng tuni tan in ka bil haa a amang thei nai sih hi. Kanu’n ahing neem nate jal in ka lung a muang ah nuam tahleh muang tah in ka imu thei ta hi. Ahin atuung in vang tua zaan a Kanu hing heneem dante, ahing jaw dante leh kei ma a lung muantheina,jau nonlou a ahing koi thei dan te, a kam sua te a lung muan huai daan, Itt tah a ahing kep dante leh jau leh lugmuanglou a ka um ding ahing phal lou daante, ahing concern daante leh a thupi daante ka theisiam pai nai sih hi. Ahing khual daante ka geen siam thei sih a geen kim thei leh geen chiangthei in ka ki koi sih a, ka tuah dan te leh ka geen khiat daante ka tekah chiang in kikhia kasa a ching laa ka saa a … ka thei mama a lah ka geen khe thei sih a ka geen kha thei sih hi.tu chiang in ka thei sam panpan a ka theisiam deudeu hi. Tuachiin, Kei Nu bang Nu dang um ding in ka tuot sih hi. Jong ka gingta sih a dih ding in jong ka ki koi a ka ki koi nalai a kaki koi nalai ding a kaki koi den dinghi.

A kum tawp lam ahing tungta a, ni khat bu vuo a tha chiel ding(bu sat ding) ka hi uh chi ka thei a ka tha a lawp mama hi. Pasian jal a lou jong ki kuan guge sam lou ahi man in ka nu ka pa ten hing theisiam in ka thalawp na bang in phal tah in ahing kuan sah uhi. Kei mai hilou in ka lawi leh ka paiten jong ahing thalawp pi mama ua ka bawn un ka kuan ta uhi. Na lah ki sem thei nailou ahiman in sunlai in Lawi ching kawm in Thuivai ah ka va ki mawl ua, sun nisat lai tah in ka va kisil tadi laijang uhi. Tamkhawp pha kahi man un kaki mawt thutuah ua, tui jap thei tahtah jong umlou pi in Tuilii lam ka nai tamawh uhi. Tuilii ni kikal a a geng lai tah, tui hat nalia tah a a lui ka kaan sawm ua ,bangma jauna ka nei vateh sih uhi. Tuilii geng laitah ah suang pheng lianpi khat a um a a tung lam lah thuh pi a hia, anuai lam jong mautawn tum khat ahi hi. Tuilii mai hilou in Suang kuo lian mama jau huai pipi jong um ahi nalai hi. Lui gal kai ding chiin suang khat a pat ki diang in a gal ka baw tahi. Ka tha in joujou nailou hiding ahiman in ka gal kai jou sia ,tui in ahing taw suh ta hi. Tuachiin jau seng in ka phe liplep kei a ka ki mai a kaki dinga a tui ka beng a, Tuikia suah man dehtah kahi tahi. Tuachiin ka lawipa khat in thakhat in bangma jong geel non sese lou in a hing baw suh ah, ama kei sang a lian jaw ahi man in a hing hunk he jou a a paam lam ah ahing sep khe tou jou hi. Hinanleh ama jong keima bang a tui jap theilou ve ahi man in a ke kia ta hi. Khat diang suh kia in a baw kia a ki man tuo in a nini un tui lii lam juan in akisual abang suh ta gel uhi. Bawl ding theilou in ka et thaw tamai uhi. Ka ki ngaw tua ua , ahun khe ding in ka ki sawl tuo chiat ua, ka ki kou haw ua ka peng jah chiat uhi. Bawl ding theilou in ka ding gaw chiat uhi. Thakhat in a hut khiat ding dank hat ahing ki lang hi. Kaki mai a ka paam lam ua Ngakuai khai ten a nuasia uh a ngakuai chiang uh ka mu a ka hah suh a ,amau gel in ana man ua tua chiin ka ki hunkhe jou nahnah uhi. Ashi sa thoukia bang in kaki ngai ua koima a ham a phun um lou in lou lam ka juan chiat ta ding deng uhi. Ka kha katam jong ka chi ngam vaya sih uhi. Tua hun laitah in vang geen ding a tawm mama hi.

Tuo jouin bawl ding ka lei sui jel ua, ka Gang te khat hing sawl na bang in lou gei a bual ka va the kia ua,ka lim mama ua bang teng ka manghil siang uhi. Kaki gintat sang un leh ahing ki gintat sang in ka tam man mam ua em thei ten gem in ka ki hawm dil dial uhi. Bu satte a man un thachial me Uisa thah deu mai a ki huan ka ne ua giva tah in Inn lam ka juan chiat ta uhi. Nitah ahinghi in Sunlai aka tuikiah uh ka hing gel khe doh kia a, ka dip ahing kaw tha hi.Ka mitha ten ahi bang bang in a mu kia a ka dip a dap vawt hi. Kaki ngai tuo a ka jau deu deu a ,ka ngaituo tan in ka jau ta sem hi. Thakhat in sawtpi lai a ka paa sui lai uh ka hing gel khe kia a KANU ka lung ah ahingkilou kia a tua chiin silt eng ahing hoi pai tah hi. Tuonia pat in kei leh kei a hunt ah a ki ha muan daan kasiam ta a, jau daan ka siam ta a, dip kuat daan ka siam ta hi. Ahin a jua thei lou, a dip ko theilou leh along bawl a amm tat lawmlawm vangka hi liang sih hi.

Laa phuah tun ‘Hau dan ka Siam ta, Zawn dan jong ka siam ta, ahing jilsah tu Khris Jesu jal in’ a chi bang gual in KANU jal in sil teng teng hui liang sih nanleh bang jat ahiei khat puah dan,lah dan,san dan ka siam ta a KIPAH THU ka gen hi. Ahin Pasian Thugen te geen daan hileh Tahsa leh Sisan a um aki hi nalai man in khat vei vei chiangin sil ei dei bang lou tah, I ki nep lou bang tah ahiei I pomthei lou bang a ahing um a I giintat lou bang ahisihleh iki nep lou bang tah a hing um a hing pai chiang in I mihing hiina ahing pawt khe jel a puah daan,saan daan a haa a, a naa a, aki laa khial kha dehdeh jel a I lah khial chang jong a um a tuachiangin eime leh eima ki gawt khat I suh jel uhi. Kaki pawh na lou in tuni tan ah,maban ah vang thei sing,Pasian jal in Kanu hing thuhil n ate leh ka neu thu mangmaw a ka thei ka tuah khah tamlou te jal in sil bangkim hi va ya sih nanleh bang tan ahiei khat, a tam jaw tham chi vang, pawsiam thei nalai in ka ki thei a Kanu tung ah ka lung a dam hi. Maban ah jong buaina te ahing tung chiangin Kanu leh Pasian jal a PAwsiamtou thei jel ding ka ki neem a ka Thuumna jong ahi hi.