I manghil vawtlou ding thute

I MANGHIL VAWT LOU DING THUTE


Miten a genna uah “Zouten chiang khut a sat ule sat khawmuh “ achi uhi.Tam in ki Itt, Ki Lainat,le kingaikhawh kingai poimaw I hi uh chi ahing sulang hi.Vaphual te nupa ahiai Zouvakhu te nupa ki ittna le Khupching le Ngambawm te bang a thudih le muanhuai I hi dante uh I thei bebe chiang in kipah huai in hing thathou sah mama hi.

Nidang lai in a ipu I pa ten singbul suangbul, pusa pasa na bia in ana ton ua sa aii taangaii chite ana bawl ua a k idem na uh ahi jhi.Ah bang in niteng neh tawm ding na sui ua na khosa vevo uhi.Hun hing pai jel in Innten louten hingsiam ua innma louma hing khuat in lungmuang tah in na khosauhi..Tate naute khualna jal in chin lehaa toh na pang in gim ing taw ling chi lou uhi. Mihing a ding a sepman khu Leiba ahi ana kichi bang in Bukhing me khing na kham ua sa aii taangaii ten a bawl jou ua thupi tah in na ton jou uhi.Tambang hunlai in koima midang hinkhua na phawh lou ua khovel dang um ahi chi jong a na thei vaya sih uhi.Bangma lung ngai lung geel dingumlou,pawltah chiang a bupang dim letjen a busun ding chi ana himai hi.I pu ipa tea hi le amau khovel ah aki hin lileai lltah uhi.

Kum zale chi vel masang in Mikang Gamkehte/la te (British Imperialist) tungtawn in Khantanhoi Gospel I lah uah puah tung in a um hi.Ei Zoute lah ah jong Khantanhoi in kalsang hing tawi in kum 50 vel paita in hingtung khong ho.Mikang te puahgih dawn jangkhai khat I suah mai hi.Tochiin awlawl in hing kalsuan tou jel a ,I theingailou,I mungailou hagau mangthang ding phallou a mittui naptui toh na pang vevo te ,ahing lainatpi te Thumna gaa le Hagausiangthou nasep na lamdangtah toh eaten jong awlal in I Ginna te I Sakhuo te bang ing hengtou thei ta hi.Hndampa Khrist nuojui na in awl awl in mimal chin Innkuon chin khosung vengsung chin hing jelsuohin hindanlui apath inHindan tha ah ahing jawpi tou hi.Ama ngei khu I Hundampa ahi chi muang ngam in Singbul Suong bul te be nonlou in Dawi le Kau te jong jauna a pat suohta ta uhi.Tampen tunia eiten tuni tuhun te imu thei le I tanthei na ding ua khovah hing musah a lampi sial tu ahi hi. Tuo Khantanhoi jal in Hindan khandan te le Leitung pilna te a khangtou in I niteng hinkhua ah nasa tah in hing nuamjosah in et lawm sah mama hi..Tuo Khantanhoi ma ahi leitung muntuamtuam khopi lian tuamtuam te a zin le leng le thei a sumle pai nehding tah ding suithei le summet te bawl a Khovel pilna tuamtuam sangtahtah te jil thei le simthei a theithei ding a hing puitung.Tam Khantanhoi ma ahi,India khopi te khopital Delhi a pata Zoukuom tengtengtawn ding a silhoi le thupi Ama jal a I bawl thei ua I tawithei uh. Khantanhoi Gospel jal liuliau a tamtan tung thei I hi lam manghil vawt sih vai. Dawi le Kau jauna a pat a hing laa khia a Sila I hi lou na ding ua hing tankhia a leivui lah a pat a hingkai thou a tamtan hing puitu I Pa Pasian ahi chi mang hil vawtlou ding ahi hi.

Tuobanah I hina bangbang ah ahing na pom, I leitung Pasian I Tuun Le I Juo te a hi. Nu le pa bang a hing itt ding khovel ah koima a um siha a leithei hinanle jong lei jaw ding gual hilou ahi. Laphuah siamten Tuunnu ittna ma a thupi ngai pen ua Laa tamjo thamte Tunnu ittna laa ahihi.Tuun le Juan I hi na bang bang in ahing na pom a I hoi in I siat jong in hing pai thei lou ua hing muda thei lou uhi. Tuisih ihi a pat a hing na buaipi a ei tate a ding a a tha sent e pi sial lou a hing pom nalailai tae ahi. Na mitmawna na hoilounaq na siat na khat nate muda in ensan nanle uh nang pen hing ensan theilou uhi ahi. Koimajousia in Tunnu ittna I chamkha ngeiding uhi. Ajiah pen koima Nu neilou umlou ahi man in.Sanjay Gandhi gilou in Slum a teeng a mi hinpi te tung a hahiam in tha chimit sawm in a tunnu Indira suminsia in gelgawt nanle Ta ahi man in India in Itt a lungsiat veve hi..Damlou haasat I tuah a hingna thua pi a hingna enkai jing I tuun le I juo te ei ten bang in I sangthei diei??? Sepman lah leibaa hingal a maw???

Pasian in mihing te kung ah chiindan le ngaina tuamtuam chat amau ua ding a hoi ding pen pia hi.Khat ngen akhosa Adam enthei lou in aki thuapi ding in Numei Evi pia hi.Tuochi ma bang in eite jong koima midang toh ki sukha lou dinga ahing siam hilaijang lou hi. I mi hinpi khat I mi I sa te poimawna bang le ahun a panpi dingle kithua kipawl a ki sawmdawl tuo chiat ding a ahing siam ahi chi manghil sih vai.Tuoban ah mite nuadeldel mai ding a ahing siam jong ahi tuansih a aht lou pen ding a hing siam jong ahi tuan sih hi.I theina I siamna te jahthei na ding a hun lem jong hing petuahi hi.Tampen Pasian gualjawlna haihi.Abraham Pasian Jacob Pasian le Isac Pasian jong eite Pasian ahia Nampi a hing siam a mibul hiding a hing siam tu ahi hi.Tamte jiah a kipahthu tawplou a I geengeen mai ding ahi chi manghil sih vai.Tuomabang a Ama beding Ama muang ding,kipahthu gending Ama siang a I genthei I haasat nate tun a I dei I ngai te ngen ding a ahing dei sah jiah a tambang a ahing siam ahi chi jong manghil sih vai in I Minam hina te kembit a chiing le jang a tawndan khan dan hoitahtah ahing piah te mansuo lou a gal eh ah tami suo sah ding a ahing dei ahi hi. Tua ahi tah man in miten tamte Zoute ahi chi ahing thei na dingua I ki chiamte n ate uh I puandum I puanlaisante,I laakam ngaitahtah kim mama te I tawndan kisuh mama te I namlam kilawm mamate I tuhpah,sialki.Zampi dahtal goshem….te banah le I social Institution kitup tah te enkai ding a ahing deite I hi uhi. Ipu I pa thugousia te ,innsung ki vaihawm dante ban ah I ham te I lai te kep bit ding khu I mawpuoh na ahi. Midang namdang ham le pau le laite jilsih vai in theisihvai I chi na vang ahi laijang sih hi. Thei ding ,siamding a ahun le a poimaw bang ajah siam ding ahi jo hi.Eima ham a ki giel Laisiangthou,Labu te sim in sa vai.Ei ma ham toh laite ahithei tan a gial in ki lai hah na ah jang thei lei a kembit hoimama te ki hi ding hi.Midang namdang te ham,lai ,chiindan te va ngaisang a ei a te manghil dawh chi pen siljumhuai mama le jaa lat huai mama sil ahi chi manghil sih vai.I Mot man hi jo ding ahi.’when you are in Rome do as the Romans do ana ki chi a Do what the Romans do in Zougam kichi laijang lou hi. Zoute na hi pen kiphatsahnaaheai ahiloule a hoilou lam in jang in I chi na hilou in Zong ki zumpi tuansin I chiut ahi jo hi.

Pasian in ahing piah sa I gam I lei I juun ding ,thu le laa I nei te I tawn daan I khan dan tuan bilbel te I kep a Pasian silthawn piah le gualjawlna luanglet ahi chi mang hil vawtlou ding ahi.Ama thei jing kawm jawkawmle pahtawikawm a I gam ilei I it ding a, inuipa kem ding le khang ipai tou jel ding te’n athei jing na ding ua kembit ding le hil ding a belguot ihi chimanghil lou a itha hat lai pet a sep le bawl ding ahichi jong manghil sih vai.

Tuaban ah, I ngaina hoitahtah te, ujaw naujaw kijatat tua a kithuman tuo jing te ihi chi thei jing vai. Inn sung ah nu-le-pa te ijatat a nu-le-pa te’n tate kung a hindan ding khandan ding, ham le pau dan ding, milah a umdan ding, nasep le silbawl dan ding te ban ah zii le pasal sui dan ding tanpha hing thuhil tou ditdet ua, tate’n jong thumang tah in ijui tou jel hi. Tuama bang in khosung vengsung ah jong Upa vaihawm te kijatat in kithuman vadiem te hihai. Inn le gam a sep le bawl na pou a ataltah pen ana kijui vangiem hi. I sang a Ujawte jatat na le mai et na in aneu jaw te’n sep ding bawl ding teng bawl mai te ihi. Annkuong lai a atal tah pen neh masang in koiman kuong sau lou a, neh ding tah ding a um chieng in atui tuohtuoh te le ahoi hoite kipia hi. Ujaw te sawlna kimang a, Kamsiam tah in, U, Pi, Pa, Nu, Etc. chibang in ana kihan ua, koima mintah in kilou lou hi. Tangval te’n jong nungah hel na ah Ujaw te kidem ngai lou a, touna ki-awn hi. Tambang gamtat hoi, kijatatna kithuman na te ngaina nei namte ihiman in kipah huai a kiletsah tham ching mama hi.

Dahna a kidahpi a, kipahna kipahpi namte ihi uhi. Tuaban ah khosung gamsung a panpi ngaite hahsatna tuohte, aliem abai, china luna te a um chieng a kisit lou kei a phattuom ngai tah a apoimaw le kul bang jel a kithuopi a sen ding te kisenpi a apoimaw na bang a kisit vawtlou te ihi hi. Nehding tahding silding tending umlou chieng a jong neikham kham a kihom thei minam ihi hi. Genthei na hahsatna ituoh chieng a jong kithei mawbawl a kitaisan thei namte ihisih uhi. A dahte idahpi bang a akipahte jong kipahpi a nuipih thei te le Sielpi Sieltal goujen a kipahtawi thei te ihi ua, tamte khu ichinden ding ua hoi imanghil vawtlou ding te ahi.

I gentah mabang in aki it mama te ihi uhi. Itna leiba ba ngen ihi uhi. Midang namdang ten ahing en na pen uh iki it a iki ngainatna te ahi. Khatvei lampi a kituoh jual a kilawmpawl thei pai te thei ngai lou mikhuol te bang limtah a ana zindou thei a zin nuol thei namte kihivet lou hi. Ki itna annkuong lui ngaina mama te ihi ua, tuami ki itnaki ngainatna te liensah semsem hi. Neil eh lam sum le pai sang a mel le puom kimu kisuhtuo ma thupi isa uhi. Vaphuol te nupa kigente tawh eimi le eimi ki itna akikhiehna um taluo lou hi. Lawmta ki it ki ngai, sih le sikhawm a, hin le hingkhawm ding chibang kithangsah mama te ihi uhi. Ei Zou te adding in pen sum le pai nei le gou lam sang in kikhawltuo a kivetuo jing ithupi sah jaw uhi. Tuaban ah eite pen innsung hi’n khosung hitale kivaipuohna kichien nei thei te ihi ua, inn sung a Pa, Ta, Nu, Pi, Pu, Moute le adang dang te’n sep ding le bawl ding neichiet uhi. Mithupi, mibul ihina khat ujong ahipai a kepbit ding itavuon ahi hi. Tuachi mabang in mi kiliansah ut, let ut, lal ut mite ihi ua tuana ding a panthei tan a pang vevaw a minuai a lut ut lout e ihi uhi. Kiphatna, kipahtawina ngaisang te ihi ua, asiam ding ahoi ding kituh te ihi uhi. Tamte in ihindan te ah koima eng lou in I lungtang ilunggel te hingkoi jou hi. Thusia deilou a thuhoi thupha del a taivevaw te jong ihi. Nampi lunggel ding ma jong ahi. Tambang te jiah in kiletsahpi huai mama a, hasuo vawt lou ding ahi.

Ngaina hoitah tah te ihasuo lou a ithei gige nading in mimal chin in pan ilah tahtah ngai hi chi manghil sih vai. Leitung khantouna te in ingaina hoi tahtah te ahing dep manglou a, chintah, keptah le jahthei tawntung ahithei nading a mawpuohna kikim neichiet ihi. Tuachi lou in pah le ga suong thei lou in shi ding a muot mang mai ding a seltha tha lou ding hi. I ngaina le ithei gige dingte imanghil a ikep lou ijuun lou le ingaina te tungtawn in hing guoljawltu itung ah hahiem thei ding a, tuatham lou in a Siampa, abawlpa simmawm mudah le ngaisahlou kisuoh kha ding hi.


I ngaina te le ichintuoh silte pen I Zogam jemtu ahiman in ihasuo kha pouma a ahile I ZOgam palthei nonlou ding a, I Zogam dum dildial lou a san siasuo kang papaw ding hi. I Zogam heisa bang pal nadin I sep ibawl na chiet ah hanchiam in guoljou te hivai.